Друштвото за производство на топлинска енергија „Производство на топлина Балкан енерџи ДООЕЛ Скопје“ повеќе нема лиценца за производство на топлинска енергија, соопшти Марко Бислимоски, претседател на Регулаторната комисија за енергетика на денешната прес конференција. Тој рече дека одлуката е донесена откако БЕГ побарал да му престане лиценцата. Но, како што потенцира Бислимоски, скопјани не треба да стравуваат дека ќе останат без греење.

– За денешната одлука согласно Законот за енергетика, ја известивме Владата која сега треба да спроведе постапка за избор на вршител на енергетска јавна дејност – производство на топлинска енергија. Откако ќе биде извршен изборот, РКЕ ќе издаде соодветна лиценца. Се до завршувањето на процедурата БЕГ законски е обврзана да ја врши јавната дејност – производство на топлина, по што обврската ќе ја преземе компанијата што ќе биде избрана во постапката спроведена од Владата. Ова е една од трите лиценци што ги има БЕГ. Поднесени се барања за престанок и на лиценците за дистрибуција и снабдување со топлинска енергија, по што РКЕ ќе донесе соодветни одлуки – изјави Марко Бислимоски, претседател на РКЕ.

Како клучни причини во барањето за престанок на важноста на лиценцата БЕГ ги наведува: кредитна неспособност, нарушена ликвидност, правна несигурност во работењето поради многубројни судски постапки иницирани против БЕГ, оспорување на законитоста на лиценцата за регулирано производство на топлинска енергија од правни лица и институции, како и оспорување на валидноста на договорот за закуп на основни средства.

Бислимоски рече дека новата компанија што ќе ја добие лиценцата може да биде државна, или пак под капата на Градот Скопје.

– Јас лично сметам дека компанија во државна сопственост е најдобро решение, видовме дека Град Скопје не е заинтересиран. Така е и секаде во земјите од поранешна Југославија. На пример, во Хрватска таа компаниај е во државна сопственост, во Словенија е Љубљанска топлана, во Србија општините ја вршат оваа дејност, па ги имаме претпријатија Белградски топлани, Новосадски топлани, исто е и со Сараевски топлани – рече Бислимоски.

Тој посочи и дека ние сме единствена земја во Европа која има таков Закон за енергетика кој ја комплицира состојбата, па имаме посебни лиценци за производство, за диструибуција и за снабдување со топлинска енергија, а тоа малку ја зголемува цената на парното греење.