Реконструкцијата на тимот во Барселона е веќе најавена и секој ден разни играчи се поврзуваат со Каталонците. Сега се појавија информација дека Барса е заинтересирана за Ришарлисон, напаѓачот на Евертон, чијашто вредност се проценува на околу 150 милиони евра.

23-годишниот Ришарлисон во изминатите две сезони во Премиер лигата за Евертон реализираше вкупно 26 голови во 71 натпревар.

Премиерлигашот го смета Бразилецот за негов клучен играч и затоа му е поставена толку висока цена, а Роналд Куман, новиот тренер на каталонскиот клуб во него гледа долгорочно решение за нападот на неговата екипа.

Не е невозможно првите луѓе од „Камп Ноу“ да ги почнат преговорите, а доколку ја платат наведената сума за играчот, тие би го срушиле клупскиот рекорд кога станува збор за трансфери, претходно за услугите на Филипе Кутињо беа платени 140 милиони.

Исто така, тоа би бил трет најскап трансфер во фудбалската историја, откако Нејмар од Барса се пресели во ПСЖ за 222 милиони евра, додека Килијан Мбапе од Монако во ПСЖ за 180 милиони.