Бугарското предизборие воопшто не е добар момент да се даваат какви било предлози за македонско-бугарскиот спор ие на наша штета, вели аналитичарот Петар Арсовски за акцискиот план на експремиерот Љубчо Георгиевски за решавање на проблемот со официјална Софија. 

– Никакво решение не е можно до изборите во Бугарија и нам сега не ни одговара да даваме предлози. Тоа е погрешна стратегија, се што ние сега ќе предложиме или ќе го понудиме потоа ќе биде почетна позиција на идната бугарска влада. Предлозите на Георгиевски се многу одалечени од официјалните позиции на македонската влада. Не знам со кои мотиви ги дава и не можам да коментирам, но ние имаме преговарачки тим, а тој е и коалициски партнер во владата и ако сакал да помогне можел своите идеи да ги предложи во тимот, а не јавно. Не се соопштуваат јавно така предлози – вели Арсовски за „Слободен печат“.

Викендов, независно од македонската влада и МНР, Георгиевски изнесе пет предлози меѓу кои нова специјална комисија да го расветли наводниот прогон на 130.000 и убиства на 30.000 македонски граѓани со бугарска свест, да се признае дека целата македонска преродба се обидувала да создаде заеднички јазик со бугарскиот, дека Гоце Делчев, Ѓорче Петров, Даме Груев биле учители на бугарската егзархија, без многу детали да се објави кои личности и датуми ќе се слават заеднички итн.