Аплаузот траел девет минути: Новиот филм на Скорсезе предизвика силни овации на Канскиот филмски фестивал
Новиот филм на американскиот режисер Мартин Скорсезе, кој ја раскажува приказната за убиствата на Индијанците во американската сојузна држава Оклахома во дваесеттите години на минатиот век, доби силни овации на годинашниот Кански филмски фестивал.
Громогласниот аплауз на публиката траел дури девет минути, а продолжил и по палењето на светлата, објави американскиот медиум „Варајети“.
Филмот „Killers of the Flower Moon“ трае три часа и 26 минути, а главните улоги ги толкуваат Леонардо Дикаприо, Лили Гладстон, Роберт де Ниро и Џеси Племонс.
„Ова беше толку трогателно искуство, мислам дека никогаш не сум доживеал нешто слично“, изјавил Скорсезе по проекцијата на филмот.
Новиот филм ги истражува низата убиства на богати Индијанци од племето Осаж, кои се случиле во истоимената област. Филмот се занимава и со почетоците на Федералното истражно биро (ФБИ) во Соединетите Американски Држави.
Актерката Лили Гладстон, која глуми богата жена од племето Осаж, веќе почна да добива позитивни оценки од филмските критичари, а на фестивалот морала да ги задржи солзите додека публиката ѝ аплаудирала. Љубителите на добриот филм веќе ѝ предвидуваат голем број признанија за време на сезоната на награди наредната година.
Филмот „Killers of the Flower Moon“ ќе почне да се прикажува во киносалите ширум светот од 20 октомври, а нешто подоцна ќе биде прикачен и на филмската платформа Епл плус.