ФБИ уапси маж во американската сојузна држава Аризона во врска со терористичкиот напад со религиозен мотив на оддалечен имот во Австралија минатата година, во кој загинаа шест лица. 58-годишниот американски државјанин се соочува со две обвиненија, од кои едното е поврзано за поттикнување насилство на интернет.

Тој „постојано“ им испраќал на напаѓачите пораки на интернет кои содржат „христијанска идеологија за судниот ден“, соопшти полицијата. Во заседата во Виамбил загинаа двајца полицајци и еден сосед, како и тројца напаѓачи.

Американецот беше уапсен во петокот од агенти на ФБИ во Хебер Овергард, североисточно од Феникс. Полицијата соопшти дека тројцата напаѓачи – Натаниел, Стејси и Герет Трејн – следеле два профили на Јутјуб креирани од уапсениот. Тие додадоа дека тој постојано им праќал пораки на Герет и Стејси пред нападот, кој се случи во Квинсленд минатиот декември.

Имаше и докази дека осомничениот и Герет си ги коментирале видеата на Јутјуб, изјави на денешната прес-конференција помошник-комесарката на полицијата во Квинсленд, Шерил Сканлон. Полициските инспектори од Квинсленд отпатуваа во САД за да им помогнат на ФБИ и локалната полиција во истрагата.

Смртоносниот напад се случи на 12 декември откако полицијата пристигна на оддалечениот имот во внатрешноста во сопственост на Герет и Стејси Трејн во Виамбила – околу 270 километри западно од Бризбејн. Четворица полицајци пристигнаа таму за да го проверат Натаниел Трејн, кој беше пријавен за исчезнат кај властите. Само што излегле од автомобилот за да се приближат до куќата, биле нападнати.

Двајца полицајци, Метју Арнолд (26) и Рејчел МекКроу (29), биле веднаш застрелани, а потоа повторно застрелани и убиени. Вториот полицаец бил повреден, но избегал, додека напаѓачите ја нападнале четвртата полицајка палејќи оган во обид да ја натераат да излезе.

Застрелан е и 58-годишниот Алан Даре, сосед кој се појавил на местото да помогне. Опсадата вклучуваше „многу оружје“ и траеше со часови, пред осомничените да бидат убиени од специјалните сили, соопштија властите.

Инспекторите велат дека нападот бил со предумисла и вклучувал „внимателно планирање и подготовка за борба против органите на прогонот“. Низ целиот имот се поставени камуфлирани скривалишта, бариери, држачи за оружје, пиштоли, ножеви, камери за видео надзор и огледала на дрвјата.

Полицијата во Квинсленд го опиша инцидентот како „религиски мотивиран терористички напад“ и тврди дека Герет и Стејси Трејн веруваат во „широк христијански фундаменталистички систем на верувања познат како премилениализам“.Премилениализмот е верување дека по период на уништување и екстремно страдање на Земјата, Исус Христос ќе се врати физички за да донесе мир. Тоа беше првпат екстремна христијанска идеологија да биде поврзана со терористички напад во Австралија, соопштија властите.

Човекот е обвинет според американските закони и во моментов не се планира негова екстрадиција во Австралија. Насилството со оружје е ретко во Австралија, која има некои од најстрогите закони за оружје во светот.