Алушовски: Не сум задоволен од многу работи во играта на Вардар
Вардар успеа да ја оствари и втората победа во вториот натпревар во СЕХА лигата оваа сеезона откако со 27:26 го совлада Нексе. Но и покрај победата, тренерот Стевче Алушовски не е задоволен од прикажаната игра на неговите избраници.
– Секој натпревар со Нексе е приказна сама за себе и само поради нашите грешки тие успеаа да се вратат во игра. Имавме четири разлика, а потоа следуваше несфатлив пад во играта, особено во напад каде правевме премногу технички грешки кои резултираа со брз гол на ривалот. Да бидам искрен, не сум задоволен од многу работи. Првпат кажувам дека сум разочаран по еден натпревар, за тоа како го испочитуваа играчите она што беше договорено пред натпреварот. На претходниот дуел со Војводина бев задоволен од одбраната, но сега ако не беше Борко Ристовски и нивните промашени зицери, натпреварот лесно можеше да биде во корист на Нексе. Немаме многу време за анализа, жал ми е што победивме, а ќе си одиме дома малку разочарани. Сепак на секоја победа треба да се гледа од позитивната страна и утре со ладни глави ќе анализираме што беше добро, а што лошо и подготвени ќе заминеме за Порто – рече Алушовски.