Италијанскиот моден дизајнер Алесандро Микеле, кој беше креативен директор на модната куќа „Гучи“, е назначен за нов креативен директор на модната куќа „Валентино“, пишува „Гардијан“.

Микеле се повлече од „Гучи“ во ноември 2022 година и со оваа објава завршуваат многу шпекулации во индустријата за тоа каде ќе оди понатаму овој познат дизајнер.

Дизајнерот за својата нова улога во „Валентино“ рече: „Тоа е неверојатна чест. Чувствувам огромна радост и огромна одговорност да се приклучам на модна куќа во која зборот „убавина“ е врежан на колективна приказна направена од препознатлива елеганција, префинетост и екстремна грациозност“.

Микеле е „виновен“ за ерата на кич, максимализам, родова флуидност и гик шик во модата. Неговата естетика во „Гучи“ беше поларна спротивност на тивкиот луксуз што владееше во последно време. Хари Стајлс и Били Ајлиш беа обожаватели на неговите дизајни во „Гучи“, каде тој се приклучи во 2015 година.

Микеле ќе го наследи Пјерпаоло Пичоли, многу саканата личност во индустријата, кој минатата недела се повлече од „Валентино“ по повеќе од две децении во брендот.

Микеле ќе ја започне својата нова работа следната недела, во седиштето на „Валентино“ во Рим. Неговата деби колекција за куќата, наводно, ќе биде на модната недела во Париз во септември.