Агенцијата за храна и ветеринарство во соработка со ФАО денеска и утре во Берово ќе одржи симулациска вежба за тестирање на системот на подготвеност за справување со африканска свинска чума, болест што не е присутна во земјава.

Вежбата е во рамките на проектот „Африканска чума кај свињите – подготвеност и брзо постапување”.

Практичниот дел од симулациската вежба, како што информира АХВ, ќе се реализира на индивидуална фарма во село Русиново, на комерцијална фарма во село Умлена и во ловиште, а теоретскиот дел во Берово, каде што ќе се тестира координираноста на институциите и протокот на информации во врска со болеста. Целта е проверка на функционалноста на Планот за итни мерки за справување со африканската свинска чума, со цел обезбедување висок степен на заштита при евентуална нејзина појава и спречување нејзино ширење.

Учесници на вежбата ќе бидат официјалните ветеринари од Агенцијата за храна и ветеринарство, стручни лица од ФАО, претставници од Факултетот за ветеринарна медицина и од ветеринарните друштва со кои Агенцијата има склучено договори за спроведување активности за здравствена заштита на животните од јавен интерес.