Полицијата денеска на подрачјето на СВР Охрид (во кое спаѓаат Охрид, Струга и околните места), откри 12 странски државјанки, од кои пет биле со нерегулиран престој во Македонија, соопшти МВР.

„Во акциска контрола на подрачјето на СВР Охрид вчера во два угостителски објекта откриени се 12 странски државјанки од Русија, Украина, Србија и Албанија. Пет од нив биле без пријавен престој во земјава“, велат од полицијата, не откривајќи ја локацијата или каква било друга информација за локалите во кои се пронајдени жените.

Во угостителските објекти, Трудовиот инспекторат констатирал неправилности поради што ќе следат соодветни санкции.

„Странските државјанки се предадени на Одделението за странци и реадмисија при РЦ за ГР Запад за понатамошна постапка. Петте лица се изведени пред судија за прекршоци и согласно одредбите од Законот за странци изречена им е глоба и мерка протерување на странец од земјава“, додаваат од МВР.