Денеска во САД се одржуваат претседателски избори, а освен за изборниот колеџ, една од спецификите на овие избори во однос на континентална Европа е тоа што се одржуваат во вторник. Оваа традиција има свои корени од 19 век.

Првично, деновите на изборите се разликуваа од држава до држава, но во 1845 година беше донесен закон со кој се воспоставува еден изборен ден за целата земја. (Најпрво тоа се однесуваше само на претседателските избори, но подоцна беше проширено и на конгресните.)

Во тоа време, Соединетите Држави сè уште беа претежно аграрно општество. За земјоделците, кои го сочинуваа најголемиот дел од работната сила, поголемиот дел од годината беше одземен со садење,  одгледување  и берба на културите. Почетокот на ноември беше добро време за гласање бидејќи жетвата беше завршена, но времето беше сè уште релативно благо.

Сепак, некои денови во неделата беа подобри од другите. Два дена во неделата не беа прифатливи за одржување на избори и гласање.

Повеќето Американци беа побожни христијани и затоа неделата ја користеа како ден за одмор и богослужба. Среда беше пазарен ден во многу области, кога земјоделците ги продаваа своите посеви во градот.

Покрај тоа, понекогаш имаше и потреба за патување од еден ден. Во руралните области, најблиското избирачко место може да биде оддалечено неколку милји, а во ерата пред автомобилите, патувањето до таму траеше долго.

Ако луѓето не можеа да ги користат неделата или средата како ден за патување, тогаш тоа значи дека денот на изборите не може да биде ниту во понеделник ниту пак во четврток. И така вторникот беше означен  како најдобра опција.

Причината поради која денот на изборите беше наведен како вторник „по првиот понеделник“ беше да се спречи истиот да падне на 1 ноември. Денот се сметаше за несреќен затоа што некои христијани го славеа како Ден на сите светци, а исто така и затоа што трговците обично го земаа првиот ден од месецот за да го средат своето книговодство за претходниот месец.

Иако вторникот беше избран од практични причини, гласањето на тој ден сега сè почесто се смета за пречка. Помалку од два отсто од Американците денес се вработени во земјоделството, а многу луѓе работат во вторник во текот на целата година. Бидејќи одѕивот на гласачите се намалуваше со текот на времето, некои луѓе предложија да се префрлат изборите за викенд.

Други предложија денот на изборите да остане вторник, но да биде федерален празник. Иако тие конкретни напори не беа успешни, зголемените можности за предвремено и гласање по пошта значеа дека денот на изборите не беше толку важен за гласачкото искуство како некогаш.