Белгиските земјоделци, огорчени од зголемените трошоци, еколошката политика на Европската унија и евтиниот увоз на храна, планираат од денеска да ги блокираат пристапните патишта до белгиското пристаниште Зибриж, објави весникот „Де Тијд“.

Демонстрантите планираат да го блокираат пристапот до пристаништето во Северното Море, второто по големина во земјата, најмалку 36 часа, почнувајќи од 14 часот, објави весникот, цитирајќи ги организаторите и полицијата, додавајќи дека блокадата на патот може да трае до утревечер.

– Полицијата добила информација за акцијата во пристаништето Зибриж, изјави портпаролот на пристанишните власти.

Тој рече дека не е јасно за каква акција станува збор.

Земјоделците, исто така, го блокираа сообраќајот во близина на холандската граница на автопатот Е19 денеска наутро, при што конвој трактори се упати кон пристанишниот град Антверпен, објави државната телевизија.

Белгискиот премиер Александар Де Кро денеска треба да се сретне со здруженијата на земјоделците.