Збогум чекање на шалтери, ќе се закажуваат венчавки онлајн!

венчавка свадба

Институциите нема веќе да ви бараат лична карта, извод од матична книга на родените или имотен лист кога ќе одите да вадите нови документи. Владата најавува тектонски промени во начинот на кој што ќе се вадат документите во институциите. Ќе се промени и начинот на кој се закажува термин за склучување брак во Управата за водење матични книги, се со цел да се стави крај на чекањето во редици. Вицепремиерот за борба против корупцијата, Љупчо Николовски навести дека од 1 јули следната година, институциите веќе нема на граѓаните да им бараат извод од матичната книга на родените, или имотен лист при промена на личната карта. Сите институции ќе ги повлекуваат овие податоци автоматски и вмрежано, преку национална платформа за интероперабилност. 

Високи владини извори за „Слободен печат“ брифираат како практично ќе изгледа процесот на дигитална трансформација за граѓаните. Платформата за интероперабилност, пластично е замислена како еден автопат по кој што може да се разменуваат информации, а 1304 институции ќе се приклучат на неа. Дел од овој систем веќе функционира. На пример, на интернет може да се извади сертификатот за вакцинација или дозволата за движење во полициски час. Меѓутоа, од јули 2022 година, според најавите – и институциите ќе може да си разменуваат информации по службена должност и да им заштедат на граѓаните време нерви и пари.

Нашите извори во владата го наведуваат примерот за склучување брак. Според моменталната процедура, за склучување брак сега партнерите мора да одат трипати во Управата за водење матични книги, еднаш за да се извади извод од родените, вторпат за да се потпише записник и третпат за да се подигне изводот од венчаните. Во иднина, граѓаните ќе може на интернет да поднесат барање за склучување брак, преку портал, со нивна електронска идентификација. Управата за водење матични книги автоматски ќе ги види податоците на двајцата идни сопружници, ќе провери дали се во слободна брачна состојба по службена должност, без да им бара дополнителна документација или физичко присуство и ќе им закаже термин. Наместо трипати да се оди во УВМК за склучување брак, ќе се оди еднаш и нема да се бараат документи зашто институцијата системски ќе ги види податоците во реално време.

Од 2019 година постои и систем што се вика Централен регистар на население и во него во реално време се обработуваат и поврзуваат податоците од системот на МВР, државјанствата, пасошите и трите книги од Управата за водење матични книги. Во Централниот регистар на населението веднаш ќе се слеваат сите информации од направени промени во лични карти, промена на брачна состојба, промена на живеалиште и така сите институции ќе имаат пристап до најпоследните и најточни информации за граѓанинот.

На пример, ако ФЗОМ го води граѓанинот на некоја стара адреса, а тој се преселил во меѓувреме, тогаш Фондот ќе може во регистарот на население да ги види ажурираните податоци по службена должност и да ги промени во својот систем, брифираат нашите извори од владата.

Од јули 2022 година, кога ќе ја менувате личната карта зашто сте смениле адреса или сте купиле нов стан, нема да има потреба во МВР да носите имотен лист како доказ, зашто оваа институција ќе биде поврзана во централниот систем и самата ќе може по службена должност да види дека во катастарот имотот на адресата на која што се селите е во ваша сопственост.

Причината поради која реформата ќе почне да функционира во јули 2022 година е тоа што мора да се променат 150 закони во кои што сега пишува дека граѓанинот мора да носи документи на шалтер и на увид на службеникот. Со промените на тие закони, институцијата по службена должност ќе пристапува во базата на податоци а граѓанинот нема да биде задолжен да носи документи.

Моментално граѓанинот може да пристапи до својот извод од Регистарот на население, ама од 2022 година, владата најавува дека до него ќе може да пристапат 1304 институции. Владини извори брифираат дека конкретно, граѓаните ќе можат електронски да се пријават во Агенцијата за вработување како невработени, а АВРМ веднаш ќе може да види во ПИОМ дека работниот однос е откажан и ќе го евидентира граѓанинот како невработено лице. Ќе бидат опфатени и банките, нотарите и приватниот сектор. При земање кредит од банка, или при одење на нотар, тие самите ќе ги повлекуваат потребните документи од системот и граѓанинот нема да има потреба да ги доставува лично.

Оваа огромна реформа, односно дигиталната трансформација, ќе ги опфати и институциите на локално ниво. На пример, градот нема да мора веќе да праќа данок за имот по пошта со грешки поради променета адреса на даночниот обврзник, туку пред да се изготват решенијата за данок, ќе се видат најновите информации за граѓанинот во централниот систем и нема да се изработуваат две решенија за данок. Така се очекува да се намали бројот на жалби и приговори.

За да комплетно функционира дигиталната трансформација, институциите ќе треба да набават и соодветна опрема онаму каде што ја немаат што владини извори брифираат дека ќе биде направено и сите институции имаат инструкции. Во системот ќе бидат поврзани 1304 органи на државната управа односно сите институции од јавниот сектор.

Видео на денот