Заев со барање до опозицијата: Да понесете одговорност за искажаните лаги за случајот со Мијалков
Премиерот Зоран Заев, одговарајќи на прашање од пратеникот Александар Николоски од ВМРО-ДПМНЕ каде се криел Сашо Мијалков кој два дена беше недостапен на органите на прогонот, рече дека од сите аспекти било потврдено дека тој бил во Скопје. Оцени дека е неодговорно да се тврди дека првообвинетиот во случајот „Таргет-Тврдина“ бил надвор од градот или државата и ја повика опозициската партија да понесе одговорност за сите искажани, како што рече, лаги во врска со неговото приведување.
– Самите докази кои се приложени во делот од постапката покажуваат дека неделата излегува во хотелот „Мериот“, половина час е во „Мериот“ со женско лице (сопругата) и уште три лица од обезбедувањето. Некаде попладне излегува од „Мериот“ и оди на улицата „Салвадор Аљенде“, односно „Тодор Александров“ број 69, каде што му е едно од живеалиштата, покрај другото на „Народен фронт“. До доставување на судскиот налог, веројатно бега од своето во некое од соседните објекти, маала, но е тука. И тоа е јасно и недвосмислено докажано. И сега дали тврдењето два дена дека има договор, дека власта го пушти, дека Заев се договорил, дека организирано е бегството на Мијалков токму од владечката коалиција и испадна дека не е така. Еве го Сашо Мијалков е во домашен притвор и каде е одговорноста на опозицијата за овие тврдења. Јас реков преземам одговорниост ако не го најдеме. Каде е одговорноста на опозицијата за ваквите тврдења, што бидна со „Мериот – коалицијата со СДСМ, праша премиерот Заев.
Тој додаде дека најтешкиот предмет за прислушувањето е на крај и утре се очекува пресудата каде вели, знаеме кои се се осомничени, луѓе-милионери.
– Пари бушат по цел свет, но еве го процесот е доведен до крај. Нема никакви тајни коалиции. Сашо Мијалков вие го славевте до пред три-четири години. Секогаш делот на ВМРО-ДПМНЕ вие го следевте, а функциите ви ги даваа ви беа мили и не само што го следевте името и презимето ви беше страв да му го соопштите и не само вие, туку сите во државата. И денеска по четири пати на ден се менува ставот за Сашо Мијалков, човекот кој заедно со Груевски го постави сегашното раководство на ВМРО-ДПМНЕ. Верувам дека судот утре ќе потврди уште многу други лаги за договарања со Заев или слично и на крајот треба власта да понесе одговорност, а опозицијата што да направи? – Да си понесе одговорност. Одговорноста доаѓа со правата, затоа што секоја лага, секоја невистина, се што ќе се каже, нашиот народ го цени и знае се, и ви тврдам се додека продолжувате со вакви неодговорни политики, лаги и кочења, народот ќе ви каже исто што ви кажа на последните избори – порази. Тој пораз на ВМРО-ДПМНЕ ќе расте, но ќе растат и победите на СДСМ и коалицијата. Затоа што, согласно правото и честа да се биде голем учесник во политиката, следува и правото и честа на големата одговорност во политиката, рече Заев.
Тој иронично праша дали можеби Мијалков не бил во Белата палата, седиштето на ВМРО-ДПМНЕ како една од можните опции каде би можел да биде.
– Дефинитивно тоа што го направи власта го принуди со сите законски дозволени средства да се пријави на органите на прогон и да си го прими решението за притвор, рече Заев.
На дополнителното прашање од Николоски, Заев рече дека со преземените мерки и активности со кои МВР си ја заврши својата работа, а Обвинителство и судот својата работа, и по 40 часа е постигната целта.
– Успехот се гледа во постигнување на целта. Комплетно се повикани сите потенцијални организатори и помагачи. Имаме постапено согласно сите правни прописи во државата и апсолутно е принуден како печурка по дожд да се појави во јавноста и тоа е успешно спроведена акција. Комплетно целосно, согласно системот, согласно сите надлежности на институциите кои ги имаат, по слово на законот вашиот поранешен лидер во сенка е спроведен да си ја исполни мерката притвор и да си чека соопштување на пресудата, рече Заев.