Белата куќа  соопшти дека е многу разочарувачки што премиерот Бенјамин Нетанјаху ја откажа планираната посета на израелската делегација на високо ниво на Вашингтон, откако САД се воздржаа од гласањето во ОН со кое се бара итен прекин на огнот во Газа, објави „Ројтерс“.

„Тоа е разочарувачки. Многу сме разочарани што тие нема да дојдат во Вашингтон за да ни дозволат да водиме целосен разговор со нив за остварливи алтернативи за нивното влегување на теренот во Рафах“, изјави портпаролот на Белата куќа Џон Кирби.

Кирби истакна и дека политиката на САД не е променета и покрај одлуката да се воздржи од гласањето во Советот за безбедност на ОН.

Американски функционери сепак се сретнаа на одделни разговори со израелски претставници, но со министерот за одбрана Јоав Галант, за прашања како заложници, хуманитарна помош и заштита на цивилите во градот Рафах во јужниот дел на Газа.

Јоав Галант пред состаноците со американскиот државен секретар Ентони Блинкен и советникот за национална безбедност Џејк Саливан изјави дека Израел нема морално право да ја запре војната во Газа додека не ги врати сите заложници во нивните домови.

САД не ставија вето на резолуцијата, како што очекуваше израелскиот премиер Бенјамин Нетанјаху, туку беа воздржани.

„Во мојот прв состанок со советникот за национална безбедност Џејк Саливан, јасно ќе ја објаснам важноста на падот на режимот на Хамас и враќање на заложниците во нивните домови. Ќе дејствуваме против Хамас насекаде, дури и во областите во кои не сме биле. Ние ќе создадеме алтернатива на Хамас за да можат израелските одбранбени сили да ја завршат својата мисија“, рече министерот Галант, пренесоа израелските медиуми.