За огревно дрво платиле уште летоска, а никако да им стигне
Граѓани што платиле огревно дрво уште летово, се жалат дека не добиле ниту „трупче“ и дека се смрзнуваат покрај студените печки за греење. Од „Национални шуми“, пак, смируваат дека уплатените количини ќе стигнат, но факт е дека грејната сезона веќе е во полн ек!
Нашата соговорничка од Македонски Брод во паника вели дека не знае што да прави со греењето, затоа што друга алтернатива нема, а парите за дрва веќе си ги дала.
– Дрвата што ги плативме пред повеќе месеци, никако да стигнат. Откако се смрзнавме, позајмивме мала количина од соседите, но тоа ли е решение? – огорчено прашува нашата соговорничка.
Директорката на Јавното претпријатие „Национални шуми“, Јулијана Николова, во изјава за „Слободен печат“ тврди дека нема застој во испораките и дека граѓаните треба да бидат спокојни дека уплатените количини ќе им стигнат. Според неа, до јавното претпријатие досега не стигнале поплаки од граѓаните.
– Работата на дрвосечачите зависи од временските услови, понекогаш се работи на непристапен терен, а последните дождови им предизвикаа проблеми на работниците – вели Николова.
Во јавноста се појавија шпекулации и дека „Национални шуми“ извезува дрво. Но, Николова е децидна: „ Не извезуваме огревно дрво и немаме право на тоа. Сите што уплатиле, ќе добијат дрва. Годинава сме дури подобри од лани“.
Во зависност од потребите на едно семејство за есенско-зимските месеци му е потребно меѓу 5 до 15 кубици огревно дрво. Македонија располага со 1,1 милиони хектари шума, од кои 88 до 90 проценти се во сопственост на државата, а остатокот е во приватна сопственост. Од овие површини 25 проценти се квалитетни шуми, а 75 отсто се наменети за огревно дрво. ЈП „Национални шуми“ годишно сече до 600.000 метри кубни огревно дрво, а сопствениците на приватните шуми сечат во просек од околу 100 илјади метри кубни.
– Цената на еден кубик огревно дрво е околу 2.500 денари и неа ја одредува Владата, а не е променета повеќе од десет години – информира Николова.
Продажбата на огревно дрво за физички лица може да се врши најмногу на 6 рати. Право на склучување договори имаат подружниците во кои се целосно подмирени обврските од изминатите години согласно договорите со граѓаните. Повеќе рати и попуст од 10 отсто ако се пазари во готово имаат социјално ранливите категории. Ланскиот рок за поднесување барање и склучување договори почна од 16 декември и траеше до исполнување на планираните количини огревно дрво во триесетте подрачни шумски стопанства или до 31 март годинава.