Во близина на аеродромот во Одеса, Украина, во повеќе од 20 масовни гробници беа пронајдени коски на меѓу 5.000 и 8.000 луѓе.

Сергеј Гуцалиук, раководител на регионалниот огранок на Националниот институт за историја, верува дека тие биле погубени во 1930-тите години од злогласната сталинска тајна полициска единица, претходник на КГБ од доцното советско време.

Гуцалиук за АФП изјави дека бројот на жртвите може да се зголеми со продолжување на ископувањата.

– Остатоците се откриени откако започнаа истражните работи како дел од плановите за проширување на територијата, рече тој.

Тој додаде дека некои масовни гробници веќе биле откриени во областа во претходните години.

Националноста на затворениците и злосторствата за кои биле осудени на смрт остануваат непознати.

Сепак, Гуцалиук рече дека егзекуциите датираат од 1937-1939 година, време познато како Сталинскиот голем терор.

Гуцалиук рече дека би било невозможно да се идентификуваат жртвите бидејќи тогашните документи се класифицирани и се чуваат во Москва.

„Овие документи никогаш нема да ни бидат предадени под актуелната влада во Русија“, рече тој.

Според проценките на украинските историчари, стотици илјади Украинци беа затворени или погубени во логорите во Гулаг за време на сталинистичките репресии во 1930 -тите.

Едно од најпознатите места за погубување е шумата во близина на селото Бикивнија во предградието на Киев, каде што беа погребани десетици илјади жртви во периодот од 1937 до 1941 година.

Милиони Украинци, исто така, загинаа во Големиот глад од 1932-1933 година, што Украина го смета за геноцид организиран од Сталин.