Во фабриката за шински возила „Гоша“ во Смедеревска Паланка е проектиран и изработен вагон за транспорт на контејнери. Овој тип на вагони за прв пат се произведува во Србија и е еден од најбараните товарни вагони во Европа и светот, соопшти РТС, пренесува Н1.

По пет години од стечајот и три години откако е во сопственост на „Желвоз“ од Смедерево, фабриката за шински возила „Гоша“ повторно произведува вагони. Од РТС наведуваат дека освен компанијата што го сертифицирала вагонот, во процесот на проектирање и производство учествувале само домашни компании.

„Тоа е интермодуларниот вагон „СГНСС“. По внимателна анализа на пазарот, се фокусиравме на овој производ, бидејќи има се повеќе барања за овој вид вагони и во Европа и на домашниот пазар, бидејќи транспортот на контејнери е нешто што е иднината на железничкиот транспорт,“ изјави Светозар Бугарин, генерален директор на ФЖВ „Желвоз“.

Интермодуларниот вагон е произведен во „Гоша“, а има можност да се модификува за транспорт на „ладилни контејнери“, за кои е потребно снабдување со електрична енергија. „Ова е можност што српската економија мора да ја искористи, не само во изградбата на железнички вагони, туку и воопшто.

Можам да кажам дека ваквите проекти се нешто што може да го подобри нашиот извоз и дека земјата Србија некако може да се позиционира на светскиот пазар“, додаде Бугарин.

Во фабриката за железнички возила „Гоша“ моментално работат околу сто работници, а поради проширување на производството се планира да се вработат уште толку луѓе. Месечно се прават меѓу пет и десет вагони, а како што велат во оваа фабрика очекувањата се да се произведуваат четири пати повеќе. Во 2019 година фабриката „Гоша“ ја купи „Желвоз 026“ од Смедерево за милион евра. „Гоша“ е во стечај од 2018 година, а му претходеа неколкумесечни протести и штрајкови на работниците, кои бараа неисплатени плати.