Во Чифте амам ќе биде отворена изложбата „50 години творештво“ на Ангел Димовски – Чауш
Во очекување на Програмата за 2024 година, Националната галерија почнува со првиот вонпрограмски проект и одбележување на педесетгодишното творештво на академскиот скулптор Ангел Димовски – Чауш.
Во објектот Чифте амам, на 1 февруари, во 19.30 часот, ќе биде отворена ретроспективната изложба на Ангел Димовски – Чауш, насловена „50 години творештво“. Македонската јавност ќе има можност да се запознае со богатиот творечки опус на овој наш уметник, кој повеќе децении живее и работи на релација Македонија – Франција.
Делата на Ангел Димовски – Чауш, создадени во текот на изминативе педесет години, имаат четири тематски/идејни целини. Компонирани се од фигуративни, предметни, јазични и археолошко-етнографски содржини.
– На стилски план е остварен личен израз во сите четири тематски целини, како спој на инвентивно употребен еклектицизам на архаичното, примитивистичкото, нивните модернистичко-авангардни преработки, поп и рок културата. Во таа смисла, скулптурите на Ангел Димовски – Чауш припаѓаат на модернистичко авангардната линија кој исконското го внесе во модерното. Тоа се скулптури чиј заеднички именител е интенцијата да се изрази говорот на телото обликувано во стилизирани робусни и елегантни анатомски дисторзии, или сведено на апстрахирано тело-лушпа во активност. Во неговите дела се препознаваат главниот мотив – жената и придружниот мотив на птицата, при што асоцијациите за преплетување на антропоморфното во зооморфното, и обратно, се често присутни – стои во најавата на изложбата.
Другата целина ја претставуваат сликарско-скулпторски објекти со критичка ангажираност на конкретни актуелни состојби, случувања и процеси во екологијата, политиката, културното наследство, националниот идентитет, сообраќајната (не)култура.
Третата целина се омажи за писмото/јазикот, за описменувачите и јазичните кодификатори на старословенската глаголица и кирилица и на современиот македонски јазик, додека четвртата целина е своевиден омаж на т.н. примитивизам на црнечката скулптура споена со сензибилитетот на поп и рок културата, на која ѝ припаѓа уметникот од времето на неговата младост.
Изложбата во Чифте амам ќе биде поставена до 20 февруари. Куратор е Љупчо Маленков, а соработник куратор е Горанчо Ѓорѓиевски, кустос во Националната галерија.