ВИДЕОИНТЕРВЈУ | Димитриевска: Македонија лидер во регионот по застапеност на жени на лидерски функции
„Вомен он Бордс Адриа“ или „Жени во органи на управување Јадран“ е регионална непрофитна иницијатива, основана со цел да се зголеми родовата разновидност во извршните и неизвршните раководства. Татјана Михајловска Димитриевска е амбасадорка за Македонија. Во утринската емисија на „Слободен печат“ вели дека преку платформата се залагаат за повеќе жени по управни одбори, бизниси и слично.
-Ја промовиравме иницијативата на „Вомен он Бордс Адриа“ на инаугуративниот самит за прашања од областите на животна средина, општество и управување во Западен Балкан, што се одржа во Порто Монтенегро со поддршка од реномирани организации, како што се Еуропеан Вомен он Бордс (Европски жени во органи на управување) и (Жени во процеси на управување), кои имаа значајни улоги во застапувањето за родова рамноправност во раководства на претпријатија и други ентитети. Ќе работиме со деловниот сектор, влади и меѓународни институции за да се промовира и унапреди поголема родова разновидност во управните и надзорните одбори и меѓу највисоките раководители во претпријатијата од јавен интерес во Јадранскиот (Западно-Балканскиот) регион- вели Михајловска Димитриевска .
Таа објаснува дека „Жени во управување“ е непрофитна организација. Функционира за земјите од Западен Балкан, вклучувајќи ги Словенија и Хрватска.
-Иницијативата на здружението се темели на усогласеност со Европската директива од 2022 година чија цел е поставување на 40 отсто жени на раководни функции дали во управни или надзорни одбори или 33 отсто на жени на раководни позиции на фирми кои котираат на берза. Целта е да се достигнат овие начела бидејќи Македонија се стреми за што побрз влез во ЕУ- вели таа.
Таа објаснува дека присуството на жените во раководните структури е многу битно бидејќи само хетерогените тимови можат да постигнат подобри резултати.
-Искуствата велат дека кога имаме подеднаква застапеност на двата пола тогаш имаме поголема продуктивност, поголеми финансиски резултати на компаниите, поголема креативност и иновативност. Тоа е поради различни перспективи, идеи и креативност. Според статистиките просекот во ЕУ е 35 отсто на жени во надзорни и управни одбори. Секаде каде има воведено квоти како Франција и Италија процентот е 38 отсто. За нашиот регион Македонија е лидер во регионот со жени во управни и надзорни одбори. Но ова треба да се сфати со резерва бидејќи некои не даваат известувања- вели Михајловска Димитриевска .
Таа вели дека во работењето многу е важна машката поддршка.
– Стереотипи постојат секаде и во општеството и во семејството. Затоа и постојат вакви организации со јавно говорење да се надмиант истите- вели таа.
Целото интервју погледнете го во продолжение: