Граѓаните во Рим се разбудија во шок на првиот ден од Новата година. Стотици мртви птици ја покрија централната улица во Рим. И не, не е последица од 5 Г мрежа туку, според Меѓународната организација за заштита на животните, смртта на птиците е поврзана со силниот звук на огнометот и експлодираните петарди во област богата со дрвја во која многу птици прават гнезда.

Портпарол на оваа организација тврди дека е можно птиците да умреле од страв.

Птиците, за кои се верува дека се сколовранец, од семејството врапчиња, биле пронајдени во близина на железничката станица на крајот од Виа Кавур од возач кој објавил снимки од вознемирувачката сцена на Јутјуб.

Се смета дека дезориентираните птици умреле откако исплашени од експлозиите летале во прозорци и високонапонски електрични кабли веднаш по полноќ.

Инцидентот се случил за време на новогодишната забрана за употреба на пиротехнички средства што беше целосно игнорирана. Претходните години имаше бројни случаи на кучиња кои исплашени од петардите и огнометите бегаа од своите домови.