Десетици луѓе се уапсени на денешните насилни протести кои избувнаа во руската република Дагестан, откако голем број луѓе се собраа во главниот град Махачкала, за да го изразат револтот од наредбата на властите за мобилизација на дел од населението за фронтот во Украина. На социјалните мрежи постојано се појавуваат снимки кои сведочат за жестокоста на судирите меѓу демонстрантите, од кои поголем дел беа жени, и полицијата.

Претходно, беше објавена и снимка на која се гледа како група жени опколуваат и напаѓаат полицаец, кој бега низ толпата.

A cop is running away from women, who are protesting against the war and mobilization in Makhachkala, Dagestan.

pic.twitter.com/GPupB3eh2A

— Julia Davis (@JuliaDavisNews) September 25, 2022

Протести имаше и во местото Ендиреј, каде локалните жители го блокираа влезот во гратчето и не дозволуваа да бидат одведени 110-те момчиња и мажи кои биле мобилизирани. Полицијата стрелаше во воздух со автоматски пушки за да ги смири гневните демонстранти.

Откако избија протестите, демонстрантите дополнително ги разгневи претседателот на Дагестан, Сергеј Меликов, кој изјави дека наредбата за мобилизација во републиката ќе биде спроведена „стриктно според објавените критериуми од Претседателот“. Рускиот лидер Владимир Путин неделава објави „делумна мобилизација“ на военоспособното население за војната во Украина, а жителите на Дагестан обвинуваат дека најмногу резервисти се мобилизираат во нивната република, во која живее доминантно муслиманско население.

Dagestan pic.twitter.com/BsgGVCG7Ph

— Anton Gerashchenko (@Gerashchenko_en) September 25, 2022

Според локалните медиуми, на денешните протести се уапсени околу 150 луѓе. Демонстрантите обвинија дека во полициската бркотница со демонстрантите учествувале и луѓе во цивилна облека, кои не биле полицајци. Групата „Утро на Дагестан“ на Телеграм објави повик за „лов“ на поддржувачите на мобилизацијата и на „оние кои денеска тепаа жени“, како и повик за општ бунт против централните власти во Москва и нивните сателити во Дагестан.