ВИДЕО | Полицијата во Венецуела ја врати контролата над затворот со кој управуваа криминалните банди
Властите во Венецуела ја вратија контролата над најпознатиот затвор во земјата, Токорон, кој бил целосно под контрола на криминалците.
Околу 11.000 полицајци и десетици оклопни возила биле распоредени за да ја вратат контролата врз затворот Токорон. Затворот сега е целосно испразнет, а околу 2.500 затвореници се префрлени во други затвори.
Затворот бил контролиран од бандата Трен де Арагуа, која се раширила низ Венецуела и најмалку осум други земји од Латинска Америка.
Според истрагата спроведена од венецуелската новинарка Рона Рискез, која била интервјуирана од АФП, до сега полицијата останала надвор, а управата на затворот била во рацете на бандата која изнудувала затвореници, но нудела необични услуги, со базен, зоолошка градина, обложување, сали и спортски терени.
Во соопштението за печатот, владата на Венецуела ја поздрави „успешната“ операција и „апсолутната контрола врз казнено-поправниот дом Токорон“.
Полицијата упаднала во затворот околу 7 часот, фрлајќи „гранати“ и пукајќи. Операцијата траела дваесетина минути, а официјалниот извештај засега не може да се добие.
Неколкумина од уапсените ја искористиле збунетоста за да избегаат, според полициски извори. Не се знае судбината на водачот на Трен де Арагва, Хектор Гереро Флорес, познат како „Нино Гереро“ (дете воин), кој служел 17-годишна затворска казна за убиство и трговија со дрога.
Бандата Трен де Арагуа, која наводно има околу 5.000 криминалци, се појавила во 2014 година и се занимава со „класичен“ мафијашки бизнис: киднапирања, грабежи, дрога, проституција, изнуда.
Истражувачкиот центар ИнСајт Крајм тврди дека групата е вклучена и во шверц на мигранти, а своето влијание го проширила и на други активности, некои легални, но и на перење злато и илегално ископување.