ВИДЕО | Пешевска бара одговорност за говорот на омраза и сексистичките навреди од „Балистите“
Најостро го осудуваме инцидентот во Тетово предизвикан од страна на припадници на навивачката група „Балисти’’. Во нивното објавено видео се слушаат извици со етнички и сексуални навреди кои се повеќепати извикувани. Со ваквиот однос се забележува и говор на омраза од страна на навивачката група Балисти по повод 30-годишен јубилеј, реагира пратеничката од ВМРО-ДПМНЕ Жаклина Пешевска.
–За овој скандалозен инцидент не слушнавме никаква реакција од страна на надлежните институции, од МВР и ги повикуваме веднаш најостро да го осудат и да го санкционираат овој чин со кој се шири говор на омраза и сексизам. Очекуваме и од останатите чинители, од политичките партии, меѓународните организации за заштита на човековите права, женските организации како и Клубот на пратенички во собранието најостро да го осудат ваквиот начин на делување со што би се спречиле идни вакви дејствија. Ова не е прв инцидент на навивачи од оваа навивачка група, пред само четири години ваквиот начин на ширење на меѓуетнички тензии заврши и со физички напади – вели Пешевска.
Според неа, власта наместо да толерира, а со тоа и да одобрува вакви инциденти, најитно да преземе превентивни мерки, а за навредливите скандирања и говорот на омраза, потребно е од страна на Обвинителство да се прецизира кривичното дело и да се покренат адекватни постапки за лицата учесници во случајот.
Пешевска истакна дека поаѓајќи од демократските принципи на меѓусебното почитување, а во насока на создавање на здраво општество во кое секој ќе се чувствува безбеден и слободен, ВМРО-ДПМНЕ најостро го осудува ова девијантно однесување.
Викендов навивачката група „Балисти“ од Тетово прослави 30 години јубилеј од своето постоење со марш низ тетовските улици и централниот плоштад. „Балистите“ марширајќи во повеќе наврати извикуваа навредливи зборови за неалбанското население кои содржеа и сексуални алузии. Тие скандираа „Каурски пи*ки!“ и извикуваа „Косово“, „Албанија“. Славеничкиот марш на „Балистите“ го обезбедуваше полиција, а тој кулминираше со огромен огномет.