Данил Медведев во четвртфиналето со пресврт го совлада Феликс Оже-Алијасим и за пласман во големото финале ќе игра против Стефанос Циципас.

Вториот светски рекет е на два чекори од освојување на грен слем турнирот „Австралија опен“ во Мелбурн.

Негов најголем ривал требаше да биде најдобриот светски тенисер Новак Ѓоковиќ, но тој како што е веќе познато беше депортиран од земјата поради фактот дека не е вакциниран против ковид-19.

Но, Медведев има голем почит спрема Ноле, така беше и по завршувањето на мечот со Оже-Алијасим и објасни како успеа да се врати од негативата.

– Не знам дали ќе ѝ се допадне на публиката тоа што ќе го кажам, но се запрашав кога не ми одеше: „Што би направил Новак во овој момент?“ – рече Медведев во разговорот со Џим Куриер по пласманот во полуфиналето.

Различни беа реакциите на публиката за споменувањето на најдобриот играч на светот, а се слушнаа и свирежи.