Криминални банди од Албанија нудат „попусти за празничната сезона“ на илегалните мигранти кои се обидуваат да влезат во Британија, исмејувајќи ги обидите на британските министри да ја спречат илегалната трговија со луѓе, пишува Дејли Мејл објавувајќи детали од истрагата на неделното издание коешто открива дека криумчарите на луѓе користат реклами на социјалните мрежи за да промовираат зделки со намалени цени, при што еден од нив наплаќа 5.000 фунти по лице за време на Божиќ – 37,5 отсто попуст од вообичаените 8.000 фунти.

Рекламите дојдоа откако пратениците и активистите предупредија дека бандите ќе ги искористат жестоките несогласувања во редовите на Ториевците поради имиграцијата како дел од нивните маркетинг кампањи.

Една албанска реклама на ТикТок, со фотографија од новогодишната елка во Ковент Гарден во централен Лондон, им ветува на барателите на азил кои се обидуваат да преминат во Обединетото Кралство со „100 проценти успех“. Посебна реклама на Инстаграм за простор на камион нуди „продажна цена“ за патување на 20 декември: „Едно лице 6.000 фунти. Ако сте две лица – по 5.000 фунти.

Бандите сега сè повеќе го фокусираат своето рекламирање на понудите за носење мигранти во Британија со камиони, додека една реклама нуди договор за нивно шверцување со авион за 14.000 фунти по лице.

Пристигнувањата од Албанија со бродови опаднаа откако Владата ја нарече „безбедна земја“, што значи дека нејзините граѓани не можат да аплицираат за азил во Велика Британија и назад ги враќаат во рок од неколку дена. Но, пратениците завчера предупредија дека Министерството за внатрешни работи не внимава на нелегалните премини на камиони.

Најновите податоци на Министерството за внатрешни работи покажуваат дека речиси 30.000 мигранти пристигнале во Британија со мали чамци во 2023 година, додека минатата година, имало рекордни 45.774 премини.

Алп Мехмет, шефот на Мигрејшн воч, рече: „Криминалните банди се премногу подготвени да го искористат срамниот хаос за имиграцијата во Владата за да ја донесат својата пешадија овде како лажни баратели на азил“.

Поранешниот лидер на ториевската партија, Сер Иан Данкан Смит ги повика министрите да направат повеќе за да ја исклучат употребата на ТикТок од страна на криминалците.

„Ние сме немилосрдни во нашата потрага по криминални банди кои илегално шверцуваат луѓе во Обединетото Кралство, при што граничните сили вршат опсежни претреси на камиони, приколки и контејнери кои влегуваат во земјата“, соопшти британското Министерство за внатрешни работи.

Минатата ноќ, Мета, која е сопственик на Инстаграм, соопшти дека ги затворила сметките за шверц на луѓе што безбедносните служби ги открија.

Портпаролот додаде: „Шверцот со луѓе е нелегален и таму каде што наоѓаме содржина што ја координира оваа активност, ја отстрануваме од нашите платформи“.