Во првиот натпревар од плеј-офот за влез во осминафиналето на Лига Европа ремизираа екипите на Барселона и Манчестер јунајтед со резултат 2:2.

Немаше голови во првото полувреме, но затоа во вториот дел беа расположени стрелците на стадионот „Камп Ноу“. Во 50 минута Алонсо донесе предност за каталонскиот гигант, само три минути подоцна израмнија „црвените ѓаволи“ преку Рашфорд. Во 59 минута Јунајтед беше во позитива по автоголот на Кунде, а Барса го избегна поразот во 76 минута со погодокот на Рафиња.

Мируваа мрежите на натпреварот Ајакс – Унион Берлин (0:0), а Рома загуби на гостувањето кај Салцбург со 1:0. Триумф за Австријците донесе Капалдо по асистенцијата на Павловиќ во 88 минута од средбата.

Шахтјор Доњецк славеше минимално над Рен со 2:1, Украинците поради воената состојба во нивната земја како домаќини ги пречекаа Французите во Варшава, Полска.

Во 11 минута Шахтјор стрелаше за водство кое го донесе Крискив, а непосредно пред паузата од пенал за 2:0 се погрижи Бондаренко. Рен до крајот на мечот успеа да го ублажи поразот во 59 минута со голот Токо Екамби. Реванш натпреварите ќе се играат на 23 февруари.