Денеска во Вашингтон треба да се сретнат американскиот претседател Доналд Трамп и израелскиот премиер Бенјамин Нетанјаху.

Нетанјаху се соочува со различни притисоци во Израел, од една страна да го прекине привремениот прекин на огнот со милитантите на Хамас во Газа, што го бара неговата десничарска коалиција, а од друга страна дефинитивно да го прекине конфликтот и да ги врати преостанатите заложници, кои ги бараат Израелците.

Трамп е внимателен во врска со изгледите за долгорочна трајност на прекинот на огнот во Газа, иако се смета себеси заслужен за постигнувањето на договорот за прекин на огнот и ослободувањето на заложниците, што стапи на сила на 19 јануари, ден пред Трамп да положи заклетва за својот втор мандат.

„Немам гаранција дека мирот ќе се одржи“, изјави Трамп вчера пред новинарите.

Се очекува денешните разговори на двајцата лидери да се фокусираат на долго бараниот договор за нормализирање на односите меѓу Израел и Саудиска Арабија, како и иранската нуклеарна програма, но сепак се очекува главна тема да биде втората фаза од прекинот на огнот во Газа.

Во текот на шесте недели од првата фаза на прекинот на огнот, треба да бидат ослободени вкупно 33 заложници, а Израел треба да ослободи околу 1.900 Палестинци од своите затвори. Во Газа се држат уште околу 80 заложници, а се верува дека една третина од тој број се мртви.

Во втората фаза треба да се ослободат преостанатите заложници и да се продолжи примирјето на неодредено време.

Нетанјаху е првиот странски лидер што Трамп го прими откако ја презеде функцијата по вториот мандат, а неговото доаѓање доаѓа во време кога неговата поддршка дома опаѓа.

На Нетанјаху моментално му се суди за корупција, со тврдење дека еднаш разменил услуги со медиумски магнати и богати соработници, што се сослушува пред судот во Израел. Нетанјаху ги негира обвинувањата и вели дека е жртва на „лов на вештерки“. Средбата со Трамп, кој е популарен во Израел, може да го одвлече вниманието на јавноста од судењето и да ја зголеми популарноста на Нетанјаху.

Ова е прво патување на Нетанјаху надвор од Израел откако Меѓународниот кривичен суд (МКС) издаде налог за негово апсење, како и за апсење на неговиот поранешен министер за одбрана и воен лидер на Хамас, под обвинение за злосторства против човештвото за време на војната во Газа. САД не ја признаваат јурисдикцијата на МКС над своите граѓани и на нејзината територија.

Нетанјаху и пратеникот на Трамп за Блискиот Исток, Стив Виткоф, во понеделникот ја започнаа тешката задача да преговараат за следната фаза од мировниот договор во Газа. Израелскиот премиер  оцени дека средбата со Виткоф и американскиот советник за национална безбедност, Мајкл Волц, била „позитивна и пријателска“.

Нетанјаху рече дека ќе испрати делегација во Катар, која ќе посредува во преговорите меѓу Израел и Хамас, што е прва потврда дека преговорите ќе продолжат. Нетанјаху најави дека неговиот кабинет ќе разговара и за израелските барања за следната фаза од прекинот на огнот, штом ќе се врати во Израел на крајот од неделата.

Нетанјаху е под силен притисок од екстремно десничарските членови на неговата владејачка коалиција да се откаже од примирјето и да продолжи да се бори во Газа за да го елиминира Хамас.

Хамас, кој ја консолидираше контролата над Газа од почетокот на прекинот на огнот на 19 јануари, најави дека нема да ги ослободи заложниците во втората фаза доколку војната дефинитивно не заврши и израелските сили целосно не се повлечат. Нетанјаху продолжува да тврди дека Израел е посветен на постигнување победа над Хамас и враќање на сите заложници заробени во нападот на Хамас на 7 октомври 2023 година што ја предизвика војната.

Војната би можела да продолжи на почетокот на март доколку не се постигне договор.

Целата анализа за светските случувања во видеото погоре во текстот