За разлика од земјите во соседството каде вакцина против ковид-19 први примија министрите за здравство или премиерите на државите, кај нас имунизацијата започна со докторка и главна сестра  од Инфективната клиника. И покрај тоа што министерот за здравство Венко Филипче во повеќе наврати изјави дека ќе се вакцинира, денеска не даде позитивен пример за граѓаните.

ГАЛЕРИЈА: Започна вакцинацијата против ковид-19 во Македонија, погледнете како течеше првиот ден

Тој нагласи дека не се вакцинирал зашто не сакал да ги троши вакцините кои се броени и првенствено наменети за неговите колеги кои се во директен контакт со вирусот.

– Одлучив да не се вакцинирам со првата доза на вакцини кои пристигнаа од Србија, бидејќи не сакам да им земам место на колегите кои работат со пациенти позитивни на ковид-19. Во знак на почит, вакцинацијата ја почнуваме токму со здравствените работници од ковид центрите, рече Филипче.

Тој најави дека сепак ќе се вакцинира за да им даде позитивен пример на граѓаните.

– Ќе се вакцинирам кога ќе пристигне вториот контингент вакцини. Со тоа ќе им покажам на граѓаните дека така треба и тоа е правилно за да ја спречиме пандемијата. Вакцините се безбедни, со развиени безбедни платформи и се единствен начин за развивање на колективен имунитет, рече Филипче на почетокот на имунизацијата против ковид во земјава.

– Во знак на почит, вакцинацијата ја почнуваме токму со здравствените работници од ковид центрите. Ги заштитуваме затоа што се во првите борбени линии и ни се потребни во работата! Д-р Добринка и главната сестра Габриела се чувствуваат добро и упатија порака дека ова е единствениот начин за да ставиме крај на пандемијата – изјави министерот за здравство, Венко Филипче.

ВИДЕО: Медицинските сестри од Здравствен дом Скопје откако добија кратка обука, се подготвени за апликација на вакцините Фајзер