Украина е подготвена да го ограничи извозот на храна во Европската унија за да ја олесни загриженоста на полските земјоделци, изјави Тарас Качка, заменик министер за економија на Украина. Според него, како што пренесува Блумберг, Киев може да користи алатки кои ќе го стабилизираат наглото зголемување на извозот во ЕУ.

„Ќе прифатиме извозот да не расте толку брзо и нагло како претходните години“, рече Качка. Тој додаде дека „предвидливоста на пазарот во моментов е поважна за украинските производители отколку агресивното проширување“.

Полскиот премиер Доналд Туск претходно изјави дека неговата влада размислува за привремено затворање на границата за трговија со Украина доколку Варшава не постигне договор со Киев за ограничување на увозот на храна.

„Полска плаќа превисока цена за одлуката да започне слободна трговија со Украина“, смета Туск.