Во голема меѓународна операција поддржана од Европол, разбиена е истакната ќелија на таканаречениот Балкански картел, пишуваат српските и хрватските медиуми.

Тројца клучни членови се уапсени денеска во Германија, а имот вреден повеќе од пет милиони евра е запленет во операција во која учествуваа полициите на Австрија, Босна и Херцеговина, Хрватска и Србија, соопшти Европол.

Од тројцата уапсени, еден е државјанин на Србија.

Денешната акција, во која учествуваа дури 500 полицајци, е кулминација на сложена истрага за шверц со дрога, перење пари и шверц со оружје. Вкупно 45 објекти биле претресени низ цела Германија.

За време на претресите, запленети се околу 50.000 евра во готово, два златници, бројни луксузни предмети како накит, часовници и чанти, како и три скапи автомобили. Покрај тоа, пронајдено е наполнето огнено оружје со муниција, а конфискувани се и разни документи и електронски уреди, кои во моментов се испитуваат.

Истрагата откри дека оваа криминална ќелија е одговорна за испорака на неколку тони кокаин со потекло од Колумбија, користејќи бројни методи за шверцување на дрогата во Европа. Мрежата била вклучена и во перење пари преку компании и недвижности во неколку земји во и надвор од ЕУ.

„Тројцата уапсени имале различни улоги во криминалната мрежа – од финансиери и координатори до експерти за логистика. Главниот осомничен, по потекло од Западен Балкан, а живее во Германија, е познат по тоа што користи препознатливо лого за кокаин како еден вид заштитен знак“, пишуваат хрватските медиуми.