На патеката „Аиртон Сена“, доминиканската мотоциклистка Индијана Муњоз (29) загина во текот на трката (без публика) „Гојас СуперБајк“ во бразилскиот град Гојанија.

Муњоз настапуваше во класата 600 кубни сантиметри, кобниот момент се случи при пад во свиок, а смртта настапи како последица на тешките повреди на главата.

Беше една од најпознатите бразилски мотоциклистки, а беше и инструктор за јавање. Родена во Доминиканската Република, но кариерата ја разви во Бразил каде што имаше големи успеси.

Две години по ред беше шампион на Бразил во 2013 и 2014, а во 2016 година триумфираше на трката „100 милји Интерлагос”.

Воедно освои три титули во „Кавасаки Нинџа 300″ и во „Јамаха Р3 Купот”.