Текстилните работници добија нов патрон, ќе се формираат и гранкови синдикати
Здружението „Гласен текстилец“ ќе си продолжи со работа, додава Ампева, која е горда и задоволна од пројавениот интерес за зачленување на работниците од целата земја. Наскоро ќе се отвори и апликација за зачленување во новиот синдикат
Формиран е Гласен синдикат на работниците, кој првенствено ќе се бори за работничките права во текстилниот сектор, со цел во иднина да се формираат и други гранкови синдикати во приватниот сектор, информира за „Слободен печат“, претседателката Кристина Ампева. Според Ампева, конечно по макотрпна работа и вложени напори го основале Синдикатот, кој добил потпис од ресорниот министер за труд и е заведен во Централен регистар. Здружението „Гласен текстилец“ ќе си продолжи со работа, додава Ампева, кој е горда и задоволна од пројавениот интерес за зачленување на работниците од целата земја. Таа најавува наскоро и отворање на апликација за зачленување во новиот синдикат.
– Нам ни се важни работниците и затоа во иднина неуморно ќе се бориме за сите неправилности сторени врз нив, ќе се обидеме да одговориме на сите сторени неправди и непочитување на работничкиот труд. Заврши времето на жолтите синдикати кои беа „слепи“ и глуви“ за проблемите на работниците. Гласен синдикат на работниците е новата реалност, која на работниците им е потребна. Гласен синдикат секогаш ќе се бори гласно и секогаш ќе биде рамо до рамо со работникот. Затоа ги повикуваме сите работници од приватниот сектор да ни се приклучат и целосно да ни ја дадат довербата бидејќи ќе направиме промени кои до сега биле само ветувани – поентира Ампева.
Како здружение кое е основано од работници, работнички и активисти за човекови права, од 2017 година „Гласен текстилец“ се обидуваше да ја отвори темата за ниските плати, мобингот и лошите услови за работа на текстилните работници, истакнува досегашната претседателка, која и самата е поранешна текстилна работничка. Таа во разговор за нашиот весник, објаснува дека како здружение имале посебна сатисфакција од покачувањето и изедначувањето на минималната плата за сите, од која било гранка и сектор, бидејќи во тоа успеало едно мало штипско здружение без никакви финансии и речиси никакви ресурси, но поддржани од работниците. Но, сепак вели дека Здружението секогаш се стремело да постигне и повеќе и затоа размислувале кон формирање синдикат.
-За разлика од синдикатот, ние не можевме да влеземе во фирмите, да преговараме и договараме на самото место со самите работници наспроти работодавачите. Не можевме да правиме колективни договори, а со моменталниот потпишан од ССМ и од ОРМ, законски ви е, на пример, исплатата од 100 денари на име К-15. Тоа не би се случило кога ние би биле оние што ќе го потпишуваат Колективниот договор за стопанството. Ние и досега лекувавме грешки на синдикатот, наместо да спречиме и ги унапредуваме правата преку тие колективни договори. Затоа одлучивме да формираме синдикат. Синдикат за сите работници, и за оние од јавниот и од приватниот сектор. Синдикат што нема да „седи во ничиј скут“, а ќе се бори за работниците, нивните права и достоинствени плати – вели Ампева.