„Процедурите за 1200 вработувања во здравството течат, некои болници веќе објавиле огласи, a во тек се и најавените вработувања на специјализантите“, рече тој.

Таравари додаде дека ќе има линеарно зголемување од 2.500 денари за сите вработени во јавниот здравствен сектор. Просечната плата во здравството, како што рече тој, сега се движи околу 50.200 денари.

Според него, ова е највисок реален раст на платите во јавното здравство во последната деценија и доказ дека кога има политичка волја има и резултати.

„Наша цел е да изградиме здравствен систем во кој професионалците ќе се чувствуваат ценети, мотивирани и подготвени да останат и работат тука, дома. Со ова зголемување, испраќаме порака дека достоинството на здравствениот работник не се преговара, тоа се брани и унапредува“, рече Таравари.

Тој додаде дека со зголемувањето на платите на здравствените работници, им се испраќа пораката дека тие се темелот на нашето здравство, но и дека државата стои зад нив.