Спасеновски: МПЦ ќе добие томос за автокефалност
Професорот и поранешен пратеник, Александар Спасеновски, вели дека целокупниот процес со статусот на Македонската православна црква доби на динамика со одлуката на Вселенската патријаршија од 9 мај.
Според него, заслуги за решавање на статусот на црквата има и во Преспанскиот договор, кој освен членството во НАТО, ја донел и оваа придобивка.
„Серијата на активности во рамките на православната црква поврзани со известувањето на Синодот, изјавите на вселенскиот патријарх, писмата од македонскиот државен врв, писмата на вселенскиот патријарх до СПЦ итн. Сè тоа се серија на настани кои доведоа до ова кое го имаме денеска. Меѓутоа, треба да бидеме искрени и тоа јавно да го кажеме дека ако треба да ги бараме и да ги најдеме придобивките од склучувањето и потпишувањето на Преспанскиот договор со кој беше надминат долгогодишниот спор кој го имаше Република Македонија со Република Грција околу уставното име на нашата држава, освен членството на НАТО, во тој случај бездруго тоа е и ова кое го живееме, а е поврзано со стекнувањето на автокефалниот статус на МПЦ“, рече Спасеновски во емисијата „Вин-вин“ на телевизија Телма.
Тој смета дека во процесот меѓу СПЦ и МПЦ-ОА никој не бара меѓусебно да се откажат или прифатат нешто, како и дека процесот оди кон тоа МПЦ да добие автокефалност.