Претседателот на Србија Александар Вучиќ се закани дека ќе ги ангажира најдобрите адвокати за да тужи светски медиуми кои пренесоа дека наводно имал улога во монструозното „Сараевско сафари“. Хрватскиот новинар Домагој Маргетиќ го пријави Вучиќ во обвинителството во Милано за неговото наводно учество во „Сараево Сафари“ кое го истражува Италија.

Кога некој толку очигледно лаже, веројатно мора да плати многу. Ќе ги собереме најдобрите адвокати и ќе видиме за околу 15 дена, рече Вучиќ, одговарајќи на коментарот на новинар дека неговата најава дека ќе тужи одредени светски медиуми наишла на одѕив, објави Телеграф.

Според него, парите со кои што ќе тужи не се негови, туку адвокатите ќе ја земат наградата по завршувањето на споровите, а тоа што тој ќе го добие ќе го донира за изградба на манастир.

Вучиќ рече дека „никогаш не тужел ниту еден медиум за написи и лаги што ги објавиле за него“, но дека сега ќе ги ангажира најдобрите адвокати во светот да ги тужат „оние што имаат многу пари, од Гардијан, Дејли Меил и сите тие“ за невистини за неговото учество во „Сараевското сафари“.

Германскиот весник Франкфуртер алгемајне цајтунг го отвори прашањето: „Што стои зад триесет години старата приказна?“ Според наводите, за време на опсадата на Сараево (1992–1995), богати луѓе од САД, Канада, Русија и Западна Европа плаќале големи суми за да пукаат врз цивили од ридовите над градот.