„Слободен печат“ дознава: „Јавна соба“ се затвори, но ќе се открива дали е гнездо на малолетничка проституција
Групата „Јавна соба“ на мобилната апликација Телеграм е затворена по барање на МВР, дознава „Слободен печат“ од високи извори во министерството. Како што дознаваме од извори во истрагата, иако главниот акцент е ставен врз тоа да се поведат постапки за злоупотреба на лични податоци и за производство и дистрибуција на детска порнографија, сепак, истрагата ќе добие и нов тек.
Имено, полицијата моментално истражува и дали „Јавна соба“ е гнездо за контакти и ланец за подведување, проституција, вклучително и малолетничка.
– Во МВР истрагата не е затворена, туку утврдуваме која е целта на формирањето на групата. Дали е тоа само споделување на експлицитни фотографии, или можеби станува збор да се направи ланец со проституција, вклучително и малолетничка – ни изјави заменичката на министерот за внатрешни работи, Славјанка Петровска.
Потребни беа 5 дена за компанијата со седиште во Лондон да изреагира на барањето на македонската полиција. До утринава, кога групата беше активна, се споделуваа експлицитни содржини во неа за малолетни и полнолетни девојки, вклучително со нивните телефонски броеви, разголени фотографии и видео материјали со порнографски содржини. Имаше и ценовници за наводните услуги на девојките.