Скандинавците ќе бидат „хит“ во зимскиот преоден рок 2020!?
Официјално зимскиот преоден рок ќе започне на 1. јануари, а според најавите Скандинавците ќе бидат во центарот на вниманието.
На првиот ден од 2020 година ќе започне зимскиот преоден рок, а во продолжение погледнете ја листата на играчи кои би можеле да го променат клубот.
– КРИСТИАН ЕРИКСЕН: Неговиот договор со Тотенхем истекува наредното лето, тој може уште сега да договори трансфер без обесштетување. Во јануари Тотенхем би можел да добие барем еден симболичен надомест, а во трката за Данецот е Реал Мадрид.
– ЗЛАТАН ИБРАХИМОВИЌ: Швеѓанецот минатиот месец го напушти Лос Анџелес Галакси. Моментно е слободен играч, најблиску до неговиот потпис е Милан, а се шпекулира и трансфер во Евертон кој е предводен од менаџерот Карло Анчелоти.
– ЕРЛИНГ ХАЛАНД: Норвешкото фудбалско „чудо“, после одличните шест месеци во Салцбург, го привлече вниманието на Манчестер јунајтед и Јувентус. Интерес покажуваат уште екипите на Лајпциг и Борусија Дортмунд. Според „Трансфермаркт“ вреди 45 милиони евра, но Австријците не сакаат да го продадат за помалку од 50 милиони евра.
– ЕДИНСОН КАВАНИ: Неговиот договор му истекува во јуни. Се шпекулира дека веќе се договорил со Атлетико Мадрид, прашање е дали сега ќе им се придружи на „јорганџиите“ или наредното лето.
– МАРИАНО ДИЈАС: Нема ниту минута оваа сезона за Реал Мадрид во „Ла Лига“. Рома се спомнува како негова идна дестинација.
– БРАХИМ ДИЈАС: Дојде од Манчестер сити во Реал Мадрид, но никако да се избори за настап, па се очекува да биде позајмен.
– АРТУРО ВИДАЛ: Чилеанецот не е среќен во Барселона. Интер е подготвен да го ангажира, имаше одлична соработка со Антонио Конте додека беа во Јувентус.
– КАРЛЕС АЛЕЊА: Талентот на Барселона не е првотимец, потребни му се натпревари. Би можел да оди на позајмица во Бетис или Хетафе.
– ЖАН-КЛАР ТОДИБО: Младиот француски централен бек исто така е во втор план на „Камп Ноу“. За неговите услуги во редот се Милан и Баер Леверкузен.
– ТОМА ЛЕМАР: Се мачи во Атлетико Мадрид, тренерот Диего Симеоне веќе ја загуби довербата, па можно е наскоро да се случи прекин на соработката.