Скалони ги шокираше Аргентинците: По победата над Бразил најави заминување?!
Aргентина во натпревар кој беше одбележан со многу инциденти пред почетокот и доцнеше околу половина час го победи Бразил на „Маракана“, а по натпреварот изненадувачки селекторот Лионел Скалони како да најави заминување.
Скалони ја предводеше Аргентина до титулата светски шампион во Катар, но репрезентацијата игра одлично и во мундијалските квалификации. Аргентинците се лидери на табелата со 15 бода, но Скалони тврди дека притисокот кој е врз него е преголем.
„Во оваа прилика би сакал да кажам една важна работа. Морам многу да размислам во овој момент, треба да одлучам што ќе правам и каков ќе биде мојот следен потег. Не е мое заминување, меѓутоа морам да размислам на иднината. Границата е поставена многу високои и тешко е да продолжите да победувате. Нашите играчи заслужуваат селектор кој секогаш ќе носи со себе максимална енергија. Ова им го кажав на фудбалерите и претседателот“, изјави Скалони.
Ова обраќање на Скалони беше и неговата единствена изјава на прес-конференцијата бидејќи стана и замина без да дозволи новинарите како што е вообичаено да поставуваат прашања.