Што прави денеска: Ели Танасковска, уредник и ТВ-водителка
Еве како изгледа едно деноноќие на познатото ТВ-лице Ели Танасковска.
„Ова е рубрика, која често ја читам зашто во ова отуѓено и извртено време, драго ми е да прочитам како луѓето го минуваат времето. Искрено, жалам за моите стари навики, одењето на базен, вежбална, зашто приликите ми нацртаа една поинаква рута.
Домот е моето цело царство. Не сум ранобудец, останувам доцна до 02.00 – 03.00 речиси секоја вечер, на вибер-конекција со ќерка ми и внука ми, кои живеат во Канада. Мојот свет е поделен – половина тука, половина таму. И најдобрите другарки и дел од семејството ми се таму. Смеа, песна, сликања и раскажувања, се дел од нашиот живот.
Наутро не пијам кафе. Имам домашен миленик, а покрај него уште неколку пред зграда, со кои ми почнува секој ден. Хранење, милување, играње на трева. Помалата ќерка Леона ме чека и додека се подготвуваме за работа, ме исполнува со најпозитивни и духовити мисли. Во зависност од обврките, обично имам средби со гости, планирани во студио, разговори и кратки муабети со некои колеги.
По пат, застанувам на пазар, во продавница, ако некој ми оставил обврска да му купам нешто (родители, соседи), кратко им доставувам, си разговараме, се прегрнуваме и дома почнува моето царство.
Попладне, додека пешачам, ќе ѕирнам низ прозорец како оди часот на Леона, нови кореографии, фигури, а децата ме исполнуваат со најискрени насмевки и едно најубаво чувство на безгрижност и среќа.
Обожавам да готвам, да правам специјалитети, и вечерата е задолжена за семејството. Често покануваме гости и уживаме во веселата атмосфера.
Секогаш слушам музика и најубаво ме релаксира. Необична е возбудата, но секоја вечер кога се прибираат дома, Леона, сопругот и нејзиното момче, покрај трпеза, пред ТВ, гледаме филм или се забавуваме со интересни теми. И очекување на вибер кога Изабела се конектира, а сите заедно не можеме да се изнагледаме и изназбориме. Виртуелни бакнежи и прегратки. Викендите, кога сме слободни најчесто сме во Дојран. Тоа место ми дава една посебна смиреност и енергија. Имам драги личности кои ми се како семејство.“