Резолуцијата за Сребреница моментално се гласа во Генералното собрание на Обединетите нации во Њујорк, а за да се усвои тој документ, најверојатно ќе биде потребно просто мнозинство од гласовите на земјите-членки, односно 97 од 193.

Со неа се бара според меѓународното право, злосторството геноцид да биде индивидуализирано и не може да се припише на ниту една етничка, верска или друга група или заедница како целина“.

Српската делегација во Њујорк предводена од претседателот Александар Вучиќ до почетокот на гласањето се обидуваше да убеди што повеќе земји да не ја поддржат.

Иницијатори на предложениот текст на резолуцијата беа Германија и Руанда, а Владата на Црна Гора поднесе амандмани на нацртот кои беа прифатени од ОН.

Што стои во Резолуцијата за Сребреница?

Конечниот нацрт на Резолуцијата се уште не е официјално објавен, но одредени медиуми, како што е „Гласот на Америка“, тврдат дека имале пристап до тој документ и ја објавиле неговата содржина:

– Се предвидува дека 11 јули ќе биде прогласен за Меѓународен ден на сеќавање на геноцидот во Сребреница, кој ќе се слави секоја година.

– Дејствата што ги величаат осудените за воени злосторства, злосторства против човештвото и геноцид се безрезервно осудени, вклучително и оние кои се одговорни за геноцидот во Сребреница.

– Ја нагласува важноста од завршување на процесот на пронаоѓање и идентификување на преостанатите жртви на геноцидот во Сребреница и нивното достоинствено погребување

– Повикува на продолжување на кривичното гонење на сторителите на геноцидот во Сребреница

Сите држави се поканети целосно да се усогласат со своите обврски од Конвенцијата за спречување и казнување на криминалот на геноцид, меѓународното обичајно право за спречување и казнување на геноцид, притоа почитувајќи ги одлуките на Меѓународниот суд на правдата.

Од генералниот секретар на Обединетите нации се бара да воспостави информативна програма со наслов „Геноцид во Сребреница и Обединетите нации“ за да ги започне подготовките за 30-годишнината од комеморацијата во 2025 година.

Од генералниот секретар се бара да ја испрати резолуцијата до сите земји-членки, организациите на системот на Обединетите нации и граѓанските организации, се вели во нацрт-резолуцијата.

Како што пишува Гласот на Америка, во преамбулата на текстот на резолуцијата се наведува дека „кривичната одговорност според меѓународното право за злосторството геноцид е индивидуализирана и не може да се припише на ниту една етничка, верска или друга група или заедница во целина.

Вучиќ: Резолуцијата за Сребреница има четири цели

Претседателот Александар Вучиќ заедно со српската делегација отпатува во Њујорк каде порача дека „со сета сила и срце ќе се бори за иднината на неговата земја“.

Според него резолуцијата за Сребреница има четири цели:

– Ревизија на пресудата за одговорност на Република Србија

– Некој би сакал да добие некој денар од Србија и да ја тужи за компензација за воена штета.

– Дополнително оптоварување на Србија и ставање на сè на нејзини плеќи

– Нивната цел не е градење поблиски односи, туку желбата да се уништи секаков вид протест против нив

Претседателот рече дека секој „кој ќе гласа против“ резолуцијата или „се воздржува“ ќе биде пријател на српскиот народ.