Шпанија бронзена во најефикасниот меч за трето место во историјата на ракометните Мундијали
Освојувач на бронзениот медал на 28 Светско ракометно првенство во Полска и Шведска 2023 е репрезентацијата на Шпанија.
Иако после првото полувреме водеше домаќинот Шведска со 22:18, во вториот дел црвената „фурија“ направи пресврт за конечни 39:36 во најефикасниот натпревар за трето место во историјата на Мундијалот.
На денешниот дуел во „Теле 2“ арената најефикасен беше Фигуерас со девет погодоци, следен од А. Дујшебаев кој запиша седум. Кај Швеѓаните Ване доминираше со девет голови, два помалку имаше Екберг.
За Шпанците ова е трета бронза на светските првенства, претходно беа третопласирани во 2011 и 2021 година.
На СП 2023 петтата позиција ја освои Германија која со 28:24 ја совлада Норвешка, додека Египет по продолженијата со 36:35 беше подобра од Унгарија во борбата за седмото место.