Извршниот директор на „Модерна“, Стефан Бансел, изјави дека заштитата што ја обезбедува засилената доза на вакцината против ковид-19 најверојатно ќе опадне со текот на времето и дека на граѓаните можеби ќе им треба дополнителна, четврта доза наесен за да ги одржат потребните нивоа на антитела.

Бансел рече дека оние кои ја примиле бустер дозата минатата есен веројатно ќе имаат доволно заштита за да ја преживеат зимата, но дека ефективноста на таа доза најверојатно ќе опадне во текот на следните неколку месеци, слична ситуација како по првите две дози.

Во моментов, нов голем бран на инфекции со ковид се шири низ светот поради варијантата омикрон. Во САД, седумдневниот просек сега изнесува повеќе од 574.000 нови случаи на ден, пишува Си-Ен-Би-Си.

„Мислам дека ќе ни требаат дополнителни бустер дози во есента 2022“

Извршниот директор на Модерна рече дека владите, вклучително и Велика Британија и Јужна Кореја, веќе нарачуваат дополнителни дози.

„Сè уште мислам дека во есента 2022 година, но и подоцна, ќе ни требаат дополнителни бустер дози на вакцината“, рече Бансел, додавајќи дека постарите лица или оние со здравствени проблеми можеби ќе треба да се вакцинираат еднаш годишно во случај на пандемија.