Прочуената базилика Саграда Фамилија во Барселона, стана највисоката црква во светот откако дел од нејзината централна кула беше подигната со кран и вградена на врвот на градбата, соопштија црковните претставници, пренесува Би-би-си.

Делото на архитектот Антони Гауди сега е високо 162,91 метар, надминувајќи ја кулата од 161,53 метри на готската црква Улм Минстер во Германија, пишува „Гардијан“.

Работата на Саграда Фамилија сè уште е во тек – централната кула на Исус Христос ќе достигне висина од 172 метри кога ќе биде завршена во наредните месеци. Првиот дел од кулата беше поставен вчера со кран. Камен-темелникот на базиликата бил поставен во 1882 година, а Гауди, кој починал во 1926 година, не очекувал црквата дека ќе биде завршена во текот на неговиот живот.

Во моментот на неговата смрт, била завршена само една кула. ​​Во изминатите децении, изградбата се забрзала, бидејќи Саграда Фамилија стана едно од најпосетуваните туристички места во светот.

Препознатливиот стил на Гауди, кој ги комбинира католичката симболика и формите инспирирани од природата, привлекува милиони посетители, истакнуваат медиумите. Минатата година, 4,9 милиони луѓе платија билет за обиколка, а собраните пари се користат за финансирање на понатамошни работења на црквата.

Се очекува работата на декоративните детали, скулптурите и скалите што водат до главниот влез на зградата да продолжи во текот на следната деценија.

Следната година се одбележува 100-годишнината од смртта на Гауди, по чиј повод црквата ќе организира серија настани посветени на неговото наследство.

Саграда Фамилија во Барселона е подготвена да ја подигне централната кула и да стане највисоката црква во Европа