САД воведоа санкции против истакнатиот турски бизнисмен Ситки Ајан, кој наводно е близок со турскиот претседател Реџеп Таип Ердоган, поради кршење на американските ограничувања за продажба на иранска нафта.

Американското Министерство за финансии денеска објави дека го казнува Ајан и бројни компании контролирани од него и неговото семејство и соработници за посредување во продажбата на иранска нафта во вредност од стотици милиони долари на Иранската револуционерна гарда.

Ајан и сите компании поврзани со него, исто така, переле пари од тие продажби и за Револуционерната гарда и за либанскиот Хезболах, кои САД ги сметаат за терористички организации.

Санкциите вклучуваат замрзнување на имотот што Ајан или неговите компании може да ги има во САД и забрана на Американските државјани да прават бизнис со нив.

„Компаниите на Ајан склучија меѓународни договори за продажба на иранска нафта на странски купувачи, организираа пратки на нафта и помогнаа во перењето на приходите, прикривајќи го потеклото на нафтата и интересот (на Револуционерната гарда) за продажба“, се вели во соопштението на Министерството за финансии.