Индонезиските, азербејџанските и пакистанските војски се меѓу главните кандидати за идните стабилизациски сили во Појасот Газа, изјави денес функционер на Министерството за одбрана на САД.

Функционерот, кој разговараше со Политико под услов да остане анонимен, рече дека ниту една земја не презела цврста обврска, но Индонезија, Азербејџан и Пакистан досега изразија најголем интерес нивните трупи да учествуваат во стабилизациските сили во Газа.

Таканаречените меѓународни стабилизациски сили се клучна компонента на предложениот мировен план на американскиот претседател Доналд Трамп за завршување на војната меѓу палестинското милитантно движење Хамас и Израел, кој има за цел да го отвори патот за евентуална демилитаризација и реконструкција на Газа.

„Тоа е во перспектива од два до три месеци од денот кога ќе се донесе одлука“ за тоа кој ќе учествува, рече Ден Шапиро, поранешен висок функционер на Пентагон за Блискиот Исток за време на администрацијата на Бајден, осврнувајќи се на временската рамка потребна за формирање стабилизациски сили.

Соединетите Американски Држави испратија 200 војници во Израел за да помогнат во координирањето на напорите за одржување на прекинот на огнот и стабилизирање на енклавата.