„Сабине“ се приближува кон Германија: Се очекуваат ветрови со брзина од 120 км/ч
На повисоките места брзината на ветерот ќе изнесува околу 175 км/ч, а метеоролозите предупредуваат на опасност од паѓање на дрвја.
Германија се подготвува за невремето кое веројатно ќе трае два дена. Се предвидува да почне в недела и да предизвика големи нарушувања во транспортот.
Невремето „Сабине“, кое доаѓа од Атлантикот, се очекува да стигне до северозападниот дел на земјата в недела околу пладне по локално време. На брегот на Северното Море се очекуваат големи ветрови со брзина од 120 км на час. Потоа бурата постепено ќе замине кон југ и ноќта ќе продолжи кон Баварија, јавуваат германските медиуми.
– Ќе биде опасно посебно во ноќта од неделата кон понеделник кога бурата би требало да се претвори во оркан со налети од ветер од над 120 км/ч“, изјави Андреас Фридрих од германската Метеоролошка служба и нагласи дека најмногу ќе бидат погодени регионите околу реката Рајна.
На повисоките места брзината на ветерот ќе изнесува околу 175 км/ч, а метеоролозите предупредуваат на опасност од паѓање на дрвја.
Германските власти очекуваат и колапс на сообраќајот во одредени делови од државата, а а од германската железница ги советуваат граѓаните да не патуваат во тој период. Патниците кои веќе имаат купено билети можат да ги вратат и да ги добијат своите пари назад.
Како што пренесуваат германските медиуми, властите на провинцијата Северна Рајна-Вестфалија им препорачале на училиштата во понеделник да не се одржува настава. Градот Хамбург презема посебни мерки на претпазливост за справување со можните високи бранови кои би предизвикале поплави.