Две лица загинаа во руските напади, а десет се повредени, меѓу кои и четири деца, во украинскиот регион Запорожје, изјави денес гувернерот на регионот, Иван Федоров.

Руските сили извршија 567 напади врз 16 населени места во Запорошката област во текот на изминатите 24 часа и до утрово, рече Федоров.

Најмалку девет згради беа оштетени од експлозиите во раните утрински часови денес во градот Запорожје, изјави Федоров преку Телеграм. Градот Запорожје е административен центар на поширокиот регион.

„Службите за итни случаи сè уште работат на терен“, рече Федоров.

Во меѓувреме, руски напад со беспилотни летала ја оштети гасната инфраструктура и главниот гасовод во јужниот украински регион Одеса, предизвикувајќи пожар, изјави денес гувернерот на регионот, Олех Кипер.

„Како резултат на оштетувањето на главниот гасовод, 2.500 потрошувачи се привремено исклучени“, рече Кипер преку Телеграм.