Маскиран „провалник“ предизвика хаос во продавница за алкохол во Ашланд, Вирџинија. Откако паднал низ таванот на продавницата рано наутро во саботата, кршејќи неколку шишиња виски и предизвикувајќи неред, бил пронајден во несвест во бањата. Но, не станувало збор за човек, туку за ракун кој очигледно „се почастил“ премногу, објавува Си-ен-ен.

Пијана рација

Вработен во продавницата кој пристигнал на работа во саботата наутро наишол на сцена како од филм: скршени шишиња, истурен алкохол и срушена таванска плоча. Главниот осомничен цврсто спиел на подот од бањата. Брзо била повикана локалната контрола на животни, а на местото на настанот пристигнала и полицајката Саманта Мартин.

„Јас лично ги обожавам ракуните“, рече Мартин. „Тие се смешни мали суштества. Тој падна низ една од таванските панели и отиде на забава, пиејќи сè што ќе му се најдеше при рака – истакнала полицајката со потсмев.

Трезнење и враќање во дивината

Мартин призна дека целата ситуација ја насмеала додека го носела пијаниот ракун во засолништето за животни на отрезнување.

„Уште еден ден во бизнисот со фаќање животни, претпоставувам“, додаде таа.

Контролата на животните на округот Хановер подоцна потврди дека ракунот успешно се отрезнил и е подготвен да си оди дома.

„По неколку часа спиење и без знаци на повреда (освен можен мамурлак), тој беше безбедно пуштен назад во дивината, со надеж дека научил дека провалата и влегувањето не се решение“, соопшти одделот.