Ракометарите со пласманот во Лигата на шампиони му “донесоа” нов паркинг на Битола
Благодарение на успехот на ракометарите на Еурофарм Пелистер и нивниот пласман во Лигата на шампионите, Битола се стекна со нов паркинг.
Паркинг просторот до спортската сала “Боро Чурлевски” кој со децении беше запоставен, сега е целосно реконструиран и уреден.
„Согласно Програмата за развојни планови, спроведената постапка за јавна набавка и склучениот договор, Општината Битола, направи комплетна реконструкција на паркинг просторот кај спортската сала „Боро Чурлевски“. Проектот вклучуваше реконструкција на атмосферска канализација, коловоз и електротехника, односно соодветно осветлување на просторот. За реализацијата на овој проект, Општината Битола, издвои 18.301.800 денари,“информираат од Општина Битола.
Паралелно со реконструкцијата на паркинг просторот и спортската сала “Боро Чурлевски” е реновирана и прилагодена согласно европските стандарди за одигрување на натпреварите на Лигата на шампиони.
„Реконструктивните зафати во објектот на спортската сала ги реализиравме во соработка со јавните претпријатија и приватните фирми, согласно склучените договори, но и со активна вклученост на приватниот партнер кој е дел од РК Еурофарм Пелистер“ додаваат од Битолската локална самоуправа.