Ракометната репрезентација на Македонија денеска (15.30 ч.) ќе го игра последниот натпревар на Светското првенство во Египет, а противник е селекцијата на Белорусија.

Подмладената репрезентација која на Мундијалот дојде како прва резерва и тоа на само еден ден пред стартот на првенството, по откажувањето на Чешка, прикажа игри кои се далеку од очекуваните во последните десетина години. Беа забележани четири убедливи порази, сите со двоцифрена разлика, и една победа над Чиле која не однесе во втората рунда од Мундијалот.

Селекторот Данило Брестовац постојано истакнуваше дека настапот на Мундијалот во Египет е шанса за собирање искуство на младите ракометари, како и барањето на носител на репрезентацијата по заминувањето на искусните Лазаров, Стоилов, Манасков…

Дуелот со Белорусија нема натпреварувачко значење бидејќи и двете репрезентации немаат шанси за пласман во елиминациите и натпреварот ќе послужи за поправање на впечатокот на избраниците на Брестовац.